ແນະນຳ ສນຊ (LFND)

ປະທານ ສູນກາງແນວລາວສ້າງຊາດ ຕ້ອນຮັບຜູ້ແທນຄົນເຊື້ອຊາດລາວ ທີ່ອາໄສຢູ່ຕ່າງປະເທດ

          ວັນທີ 03 ກຸມພາ 2018 ທີ່ສູນກາງແນວລາວສ້າງຊາດ, ທ່ານ ໄຊສົມພອນ ພົມວິຫານ ກໍາມະການກົມການເມືອງສູນກາງພັກ ປະທານສູນກາງແນວລາວສ້າງຊາດ ໄດ້ຕ້ອນຮັບການເຂົ້າຢ້ຽມຂໍ່ານັບ ຂອງຄະນະຜູ້ແທນຄົນເຊື້ອຊາດລາວ ຈາກ ສະຫະຣາຊະອານາຈັກອັງກິດ ເຊິ່ງນໍາພາໂດຍ ທ່ານ ໄຊຍະການ ສີສຸວົງ ເອກອັກຄະລັດຖະທູດ ແຫ່ງ ສປປ ລາວ ປະຈໍາ ສະຫະຣາຊະອານາຈັກອັງກິດ; ໃນໂອກາດເດີນທາງມາເຄື່ອນໄຫວຢ້ຽມຢາມ, ທ່ອງທ່ຽວ ແລະ ທອດຜ້າປ່າສາມັກຄີ ຢູ່ ສປປ ລາວ ໃນລະຫວ່າງ ວັນທີ 25 ມັງກອນ-04 ກຸມພາ 2018 ໂດຍມີບັນດາທ່ານຄະນະຜູ້ແທນຄົນເຊື້ອຊາດລາວ ຈາກ ປະເທດ ອັງກິດ ຈໍານວນ 11 ທ່ານ ເຊິ່ງມີຕາງໜ້າກົມພົວພັນຄົນເຊື້ອຊາດລາວຢູ່ຕ່າງປະເທດ ຂອງກະຊວງການຕ່າງປະເທດ, ຄະນະທີ່ປຶກສາຄົນເຊື້ອຊາດລາວຂອງ ສນຊ, ​ບັນດາທ່ານຫົວໜ້າກົມ, ຫ້ອງການ, ສູນຝຶກອົບຮົມ ສນຊ ເຂົ້າຮ່ວມ.

          ການເຄື່ອນໄຫວຢ້ຽມຢາມ ແລະ ທ່ອງທ່ຽວຂອງຄະນະຄັ້ງນີ້ ຖືເປັນຄັ້ງທໍາອິດ ແລະ ເປັນທາງການ ເຊິ່ງຄະນະໄດ້ເຮັດຫລາຍກິດຈະກໍາເປັນຕົ້ນ: ໄດ້ທອດຜ້າປ່າໃຫ້ວັດ, ມອບເຄື່ອງຊ່ວຍເຫຼືອໃຫ້ໂຮງຮຽນປະຖົມຈໍານວນໜຶ່ງ ແລະ ທ່ຽວຊົມສະຖານທີ່ທ່ອງທ່ຽວຂອງ ແຂວງໄຊຍະບູລີ, ແຂວງ ຄໍາມ່ວນ ແລະ ແຂວງ ຈໍາປາສັກ

ໃນໂອກາດດັ່ງກ່າວ, ທ່ານ ປະທານ ສນຊ ໄດ້ເປັນກຽດໂອ້ລົມວ່າ:​ ກ່ອນອື່ນທ່ານໄດ້ສະແດງຄວາມຊົມເຊີຍຕໍ່ຄະນະຄົນເຊື້ອຊາດລາວ ຈາກ ສະຫະຣາຊະອານາຈັກອັງກິດ ທີ່ມີຫຼາຍໆທ່ານເດີນທາງກັບມາຢ້ຽມຢາມໃນຄັ້ງນີ້ ແມ່ນມີຄວາມໝາຍ ມິດຕະພາບການພົວພັນອັນແໜ້ນແຟ້ນ ແລະ ອົບອຸ່ນ ລະຫວ່າງເຊື້ອຊາດລາວເຮົາຢູ່ຕາງປະເທດ ໂດຍສະເພາະຄົນເຊື້ອຊາດລາວຢູ່ ອັງກິດ ແລະ ທ່ານກ່າວວ່າ: ຕະຫຼອດ 40 ກວ່າປີທີ່ ສປປ ລາວ ໄດ້ຮັບການປົດປ່ອຍຢ່າງສົມບູນ ແລະ ພ້ອມກັນປົກປັກຮັກສາ ແລະ ພັດທະນາປະເທດຊາດ. ປະຈຸບໄດ້ເປີດປະຕູສູ່ພາຍນອກ ເຮັດໃຫ້ເສດຖະກິດມີການເຕີບໂຕຢ່າງຕໍ່ເນື່ອງ. ການພັດທະນາແຕ່ລະຂົງເຂດຂະແໜງວຽກງານເປັນຕົ້ນ: ການສຶກສາ, ສາທາລະນະສຸກ, ຄົມມະນາຄົມ, ພະລັງງານ-ບໍ່ແຮ່, ກະສິກໍາ, ພື້ນຖານອຸດສາຫະກໍາ, ວຽກງານຖະແຫຼງຂ່າວ-ໂຄສະນາ, ການທ່ອງທ່ຽວ ແລະ ການພົວພັນ ລ້ວນແຕ່ໄດ້ຮັບການຂະຫຍາຍຕົວຢ່າງແຂງແຮງ ແລະ ກວ້າງຂວາງ; ລາຍຮັບສະເລ່ຍຫົວຄົນຕໍ່ປີ ນັບມື້ເພີ່ມຂຶ້ນ. ພ້ອມກັນນີ້ ທ່ານຍັງໄດ້ຫວນຄືນຄວາມເປັນມາຂອງອົງການແນວລາວສ້າງຊາດທີ່ຜ່ານ 3 ໄລຍະປະຫວັດສາດ, ທີ່ຕັ້ງ-ພາລະບົດບາດ ແລະ ໜ້າທີ່ຫຼັກ. ຈາກນັ້ນ ທ່ານ ປະທານ ສນຊ ກໍ່ໄດ້ຮຽກຮ້ອງເຊີນຊວນ ໃຫ້ຄະນະຄົນເຊື້ອຊາດລາວ ຈາກ ສະຫະຣາຊະອານາຈັກອັງ ກິດ ຈົ່ງພາກັນປະກອບສ່ວນໃນການມາຢ້ຽມຢາມ, ທ່ອງທ່ຽວ, ໂຄສະນາເຜີຍແຜ່ ແລະ ພັດທະນາປະຂອງພວກເຮົາ, ພິ ເສດປີ 2018 ແມ່ນປີທ່ອງທ່ຽວລາວ ສະນັ້ນ ຂໍເຊີນຊວນພີ່ນ້ອງ ມາທ່ອງທ່ຽວປະເທດລາວ.

          ການພົບປະໂອ້ລົມຄັ້ງນີ້ ຍັງໄດ້ແລກປ່ຽນຄວາມຄິດຄວາມເຫັນ ແລະ ສົນທະນາບັນຫາຕ່າງໆຕໍ່ການໄປມາຫາສູ່ກັນ ຢ່າງກົງໄປກົງມາຕື່ມອີກ.

2018-02-05

ປະຕິທິນ

Feb-2018
S M T W T F S
1 2 3
4 5 6 7 8 9 10
11 12 13 14 15 16 17
18 19 20 21 22 23 24
25 26 27 28

ລິຂະສິດ © 2015
ອົງການແນວລາວສ້າງຊາດສະຫງວນລິຂະສິດໄວ້ທັງໜົດ