ແນະນຳ ສນຊ (LFND)

ທ່ານ ສີສະຫວາດ ແກ້ວບຸນພັນ ເຂົ້າຮວ່ມເປີດປີທ່ອງທ່ຽວລາວ - ເທດສະການດອກງິ້ວບານຢູ່ແຂວງບໍ່ແກ້ວ

           ແຂວງບໍ່ແກ້ວໄດ້ຈັດງານເປີດປີທ່ອງທ່ຽວ 2018 ແລະ ເທດສະການດອກງິ້ວບານ ຄັ້ງທີ 18 ຂຶ້ນໃນວັນທີ 27 ມັງກອນ 2018 ນີ້ຢູ່ດອນຊາວເມືອງຕົ້ນເຜິ້ງແຂວງບໍ່ແກ້ວໂດຍມີ ທ່ານ ນາງ ປານີ ຢາທໍ່ຕູ ກຳມະການກົມການເມືອງສູນກາງພັກປະທານສະພາແຫ່ງຊາດ. ທ່ານ ສົມດີ ດວງດີ ຮອງນາຍົກລັດຖະມົນຕີ ລັດຖະມົນຕີກະຊວງການເງິນ, ມີ ທ່ານ ພົນເອກ ສີສະຫວາດ ແກ້ວບຸນພັນ ອາດີດກຳມະການກົມການເມືອງສູນກາງພັກ, ອາດີດປະທານ ສນຊ ພອ້ມອາດີດການນຳພັກ - ລັດ ແລະ ແຂກຖືກເຊີນເຂົ້າຮວ່ມ. 

         ໃນງານດັ່ງກ່າວ: ທ່ານ ຄຳພັນ ເຜີຍຍະວົງ ກຳມະການສູນກາງພັກ, ເລຂາພັກແຂວງ ເຈົ້າແຂວງໆ ບໍ່ແກ້ວກ່າວວ່າ: ເທດສະການດອກງິ້ວໃນປີນີ້ໄດ້ເປີດຂຶ້ນ ພອ້ມກັບການສະເຫຼີມລະຫຼອງການສ້າງຕັ້ງເຂດເສດຖະກິດສາມ ຫຼ່ຽມຄຳ ຄົບຮອບ 10 ປີ ຕິດພັນກັບການເປີດປີທ່ອງທ່ຽວລາວ 2018 ຢູ່ແຂວງບໍ່ແກ້ວ ກໍ່ຄືທີ່ ດອນຊາວດິນແດນທີ່ມີຊື່ລືນາມວ່າ: “ ປ່າດອກງິ້ວບານ “ ຊຶ່ງເປັນມູນເຊື້ອ ແລະ ຮີດຄອງປະເພນີອັນດີງາມທີ່ຕົກທອດກັນມາແຕ່ດົນນານຂອງປະຊາຊົນລາວບັນດາເຜົ່າ ເມືອງຕົ້ນເຜິ້ງ ແລະ ຊາວແຂວງບໍ່ແກ້ວ, ແຂວງບໍ່ແກ້ວໄດ້ຖືເອົາວຽກງານພັດທະນາ ແລະ ສົ່ງເສີມການທ່ອງທ່ຽວທາງທຳມະຊາດ, ປະຫວັດສາດ ແລະ ວັດທະນະທຳ ດັ່ງຄຳຂັວນຂອງປີທ່ອງທ່ຽວວ່າ: “ທ່ອງທ່ຽວເມືອງລາວຮຽນຮູ້ປະຫວັດສາດລາວ ຊື່ນຊົມທຳມະຊາດ ແລະ ອະນຸລັກສົ່ງເສີມວັດທະນະທຳ”. ຕະຫຼອດການເຄື່ອນໄຫວຂອງ ທ່ານ ສີສະຫວາດ ແກ້ວບຸນພັນ ຢູ່ແຂວງບໍ່ແກ້ວແລ້ວ ທ່ານຍັງໄດ້ເຄື່ອນໄຫວຢ້ຽມຢາມພົບປະກັບຄະນະປະຈຳ, ຄະນະພັກ ແຂວງໄຊຍະບູລີ ແລະ ແຂວງຫຼວງພະບາງ ຊຶ່ງເປັນກຽດຕ້ອນຮັບຢ່າງອົບອຸ່ນຈາກການນຳຂອງສອງແຂວງດັ່ງກ່າວ. ພອ້ມນີ້ ທ່ານ ສີສະຫວາດ ແກ້ວບຸນພັນ ກໍ່ໄດ້ພົບປະໂອ້ລົມຕໍ່ກັບຄະນະປະຈຳ, ຄະນະພັກ ແຂວງ ໄຊຍະບູລີ ແລະ ແຂວງ ຫຼວງພະບາງ ຊຶ່ງໄດ້ເນັ້ນໃຫ້ຄະນະປະຈຳ, ຄະນະພັກ ແຕ່ລະຂັ້ນຕ້ອງເພີ່ມທະວີຄວາມເອົາໃຈໃສ່ໃນການສຶກສາອົບຮົມ ການເມືອງແນວຄິດໃຫ້ແກ່ພະນັກງານ, ສະມາຊິກພັກໃຫ້ມີຄວາມໜັກແໜ້ນທາງດ້ານການເມືອງ, ສຶບຕໍ່ແກ້ໄຂປະກົດການຫຍໍ້ທໍ້ໃນດ້ານຕ່າງໆພາຍໃນແຂວງ ເຮັດໃຫ້ແຂວງມີສະຖຽນນະພາບທາງດ້ານການເມືອງ-ສັງຄົມມີຄວາມສະຫງົບໂດຍພື້ນຖານ. ປຸກລະດົມປະຊາຊົນບັນດາເຜົ່າເປັນເຈົ້າຕົນເອງໃນການປົກປັກຮັກສາ ແລະ ສ້າງສາພັດທະນາປະເທດຊາດ ຊຸກຍູ້ປະຊາຊົນຜະລິດເປັນສິນຄ້າແກ້ໄຂຄວາມທຸກຍາກຂອງປະຊາຊົນໃຫ້ນັບມື້ຫຼຸດໜ້ອຍຖອຍລົງເປັນກ້າວໆ ເຮັດໃຫ້ແຂວງ ໄຊຍະບູລີ ແລະ ແຂວງ ຫຼວງພະບາງ ມີບາດກ້າວໃໝ່ເລື້ອຍໆ. ນອກຈາກນີ້, ທ່ານ ສີສະຫວາດ ແກ້ວບຸນພັນ ກໍ່ໄດ້ທ່ຽວຊົມພື້ນຖານໂຄງລ່າງຂອງສອງແຂວງດັ່ງກ່າວຕື່ມອີກ.

2018-02-05

ປະຕິທິນ

Feb-2018
S M T W T F S
1 2 3
4 5 6 7 8 9 10
11 12 13 14 15 16 17
18 19 20 21 22 23 24
25 26 27 28

ລິຂະສິດ © 2015
ອົງການແນວລາວສ້າງຊາດສະຫງວນລິຂະສິດໄວ້ທັງໜົດ