ແນະນຳ ສນຊ (LFND)

ທ່ານຮອງປະທານ ສນຊ ເຂົ້າຮ່ວມງານບຸນເກຼີ ຂອງຊົນເຜົ່າກຶມມຸ ຢູ່ບ້ານລາດຄວາຍ

ຊົນເຜົ່າກຶມມຸ ບ້ານລາດຄວາຍ, ເມືອງໄຊທານີ, ນະຄອນຫຼວງວຽງຈັນ ໄດ້ຈັດງານບຸນປະເພນີ ສົ່ງທ້າຍປີເກົ່າ 2017 ຕ້ອນຮັບປີໃໝ່ 2018 ຂຶ້ນໃນວັນທີ 27 ມັງກອນ 2018, ເປັນກຽດເຂົ້າຮ່ວມຂອງ ທ່ານ ນາງ ຍອດແກ້ວມະນີ ສຸພານຸວົງ ຮອງປະທານສູງກາງແນວລາວສ້າງຊາດ (ສນຊ) ພ້ອມດ້ວຍຄະນະ, ບັນດາທ່ານການນໍາພັກ-ລັດ, ທະຫານ, ຕຳຫຼວດ ເມືອງໄຊທານີ, ການຈັດຕັ້ງຂອງບ້ານ, ຊາວໜຸ່ມ-ເຍົາວະ ຊົນ ພ້ອມດ້ວຍພໍ່ແມ່ປະຊາຊົນບັນດາເຜົ່າຂອງບ້ານລາດຄວາຍເຂົ້າຮ່ວມ,

ງານບຸນປະເພນີດັ່ງກ່າວ, ທ່ານ ຂັນໄຊ ແກ້ວພັນຄຳ ເລຂາພັກບ້ານ ນາຍບ້ານລາດຄວາຍ ໄດ້ລາຍງານສະພາບການເຄື່ອນໄຫວຂອງບ້ານໂດຍສັງເຂບວ່າ: ພາຍໃນບ້ານປະກອບມີ 3 ຊົນເຜົ່າຄື: ເຜົ່າ ລາວ, ເຜົ່າມົ້ງ ແລະ ເຜົ່າກຶມມຸ, ແຕ່ລະຊົນເຜົ່າລ້ວນແຕ່ມີວັດທະນະທຳ-ຮີດຄອງປະເພນີ ອັນດີງາມທີ່ເປັນເອ ກະລັກຂອງເຜົ່າຕົນ ແລະ  ໄດ້ພ້ອມກັນຈັດຕັ້ງປະຕິບັດມະຕິກອງປະຊຸມ ໃຫຍ່ຄັ້ງທີ X ຂອງພັກ, ຈັດຕັ້ງຜັນ ຂະຫຍາຍມະຕິກອງປະຊຸມ ໃຫຍ່ຄັ້ງ VI ຂອງອົງຄະນະພັກນະຄອນຫຼວງວຽງຈັນ, ມະຕິກອງປະຊຸມ ໃຫຍ່ຄັ້ງ VI ຂອງອົງຄະນະພັກເມືອງໄຊທານີ ກໍຄືການຈັດຕັ້ງເຊື່ອມຊຶມ ບັນດາເອກະສານສຳຄັນຂອງພັກ-ລະບຽບກົດ ໝາຍຂອງລັດ ຕິດພັນກັບການຈັດຕັ້ງເລົ່າມູນເຊື້ອວັນສຳຄັນຕ່າງໆຂອງພັກ-ຂອງຊາດ ຢ່າງເປັນຂະບວນການ ຟົດຟື້ນ; ດ້ານເສດຖະກິດຂອງບ້ານແມ່ນການປູກພືດຜັກ, ປູກເຂົ້າ 2 ລະດູ ແລະ ລ້ຽງສັດເພື່ອຂາຍເປັນສິນ ຄ້າ; ໂດຍພື້ນຖານພາຍໃນບ້ານມີຄວາມຫງົບເປັນລະບຽບຮຽບຮ້ອຍ ແລະ ກໍເຮັດໃຫ້ບ້ານໄດ້ຮັບນາມມະຍົດ ເປັນບ້ານປອດຢາເສບຕິດ, ປອດຄະດີ ແລະ ບ້ານປ້ອງກັນຄວາມສະຫງົບດີ.

ໂອກາດນີ້, ທ່ານນາງ ຍອດແກ້ວມະນີ ສຸພານຸວົງ ໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານການ ເຄື່ອນໄຫວໃນໄລຍະຜ່ານມາ ເຮັດໃຫ້ບ້ານໄດ້ເປັນໜ່ວຍພັກແຂງຮູ້ນຳພາຮອບດ້ານ ແລະ ຫຼຸດພົ້ນອອກຈາກ ຄວາມທຸກຍາກໂດຍພື້ນຖານ ແລະ ທ່ານຍັງໄດ້ເນັ້ນບາງບັນຫາສຳຄັນວ່າ: ໃຫ້ຄະນະພັກ-ຄະນະນຳ ພາຍໃນ ບ້ານຈົ່ງເອົາໃຈໃສ່ສືບຕໍ່ສຶກສາອົບຮົມການເມືອງ-ແນວຄິດ, ເຊື່ອມຊຶມແນວທາງນະໂຍບາຍຂອງພັກ-ກົດໝາຍ ຂອງລັດໃຫ້ປະຊາຊົນບັນດາເຜົ່າໄດ້ກຳແໜ້ນ ແລະ ເຂົ້າໃຈຢ່າງເລິກເຊິ່ງ, ຮັກສາຄວາມສາມັກຄີສະໜິດ ແໜ້ນອັນເປັນມູນເຊື້ອຂອງປະຊາຊົນລາວບັນດາເຜົ່າ ໃຫ້ນັບມື້ເຂັ້ມແຂງເປັນກ້າວໆ, ເອົາໃຈໃສ່ໃນການພັດ ທະນາຮາກຖານບ້ານ ໂດຍສຸມໃສ່ວຽກງານການຜະລິດກະສິກຳເປັນສິນຄ້າ ເພື່ອເຮັດໃຫ້ປະຊາຊົນຫຼຸດພົ້ນ ອອກຈາກຄວາມທຸກຍາກ. ພ້ອມກັນນີ້, ເນື່ອງໃນໂອກາດບຸນປີໃໝ່ຂອງຊົນເຜົ່າກຶມມຸ, ທ່ານໄດ້ອວຍພອນ ໄຊອັນປະເສີດໃຫ້ແກ່ປະຊາຊົນລາວບັນດາເຜົ່າໃນຂອບເຂດທົ່ວປະເທດ ເວົ້າລວມ, ເວົ້າສະເພາະ ແມ່ນຊົນ ເຜົ່າກຶມມຸ ຈົ່ງມີສຸຂະພາບແຂງແຮງ ແລະ ປະສົບຜົນສຳເລັດທຸກປະການ. ຈາກນັ້ນ ໄດ້ຮັບຊົມການສະແດງ ສິລະປະ-ວັນນະຄະດີຕື່ມອີກ.

ໃນການຈັດງານບຸນເກຼີຄັ້ງນີ້ ເພື່ອສືບຕໍ່ປົກປັກຮັກສາ ແລະ ເສີມຂະຫຍາຍວັດທະນະທຳ, ຮີດຄອງປະ ເພນີອັນດີງາມຂອງຊົນເຜົ່າຕົນໃຫ້ກວ້າງຂວາງ ແລະ ມີຄວາມໝັ້ນຄົງຕະຫຼອດໄປ ທັງເປັນການປະກອບ ສ່ວນໃນການສ້າງຂະບວນການຕ່າງໆ ເນື່ອງໃນປີທ່ອງທ່ຽວລາວ 2018 ໃຫ້ເປັນຂະບວນຟົດຟື້ນ; ເພື່ອ ສົມມາຄາລະວະ ແລະ ອຸທິດສ່ວນກຸສົນໄປຫາບັນພະບູລຸດຜູ້ມີພະຄຸນ ເປັນຕົ້ນພໍ່ແມ່, ຍາດຕິພີ່ນ້ອງທີ່ລ່ວງລັບ ໄປແລ້ວ ທັງລະນຶກເຖິງບຸນຄຸນຜົນລະປູກ ແລະ ອຸປະກອນໃນການນຳໃຊ້ຜະລິດ; ສ້າງໂອກາດໃຫ້ໄດ້ພົບປະ, ສ້າງງຄວາມສາມັກຄີເຊິ່ງກັນ ແລະ ກັນ ໃຫ້ແໜ້ນແຟ້ນຍິ່ງຂຶ້ນເລີື້ອຍໆ.

 

2018-01-30

ປະຕິທິນ

Feb-2018
S M T W T F S
1 2 3
4 5 6 7 8 9 10
11 12 13 14 15 16 17
18 19 20 21 22 23 24
25 26 27 28

ລິຂະສິດ © 2015
ອົງການແນວລາວສ້າງຊາດສະຫງວນລິຂະສິດໄວ້ທັງໜົດ