ແນະນຳ ສນຊ (LFND)

ທ່ານຮອງປະທານ ສນຊ ຕ້ອນຮັບການເຂົ້າຢ້ຽມຂ່ຳນັບ ຂອງຄະນະກໍາມະການຊົນເຜົ່າ ແລະ ສາສະໜາ ແຂວງຢຸນນານ ສປ ຈີນ

ທ່ານ ຈັນທະວົງ ແສນອາມາດມົນຕີ ຮອງປະທານ ຜູ້ຊີ້ນໍາວຽກງານສາສະໜາ ສູນກາງແນວລາວສ້າງຊາດ (ສນຊ) ໄດ້ຕ້ອນຮັບການເຂົ້າຢ້ຽມຂ່ຳນັບຂອງທ່ານ ເຈິງ ຈຽນ ຊີ, ຮອງຫົວໜ້າຄະນະກຳມະການຊົນເຜົ່າ ແລະ ສາສະໜາ ແຂວງຢຸນນານ ສປ ຈີນ ພ້ອມດ້ວຍຄະ ນະ ໂດຍມີບັນດາທ່ານຮອງຫົວໜ້າກົມສາສະໜາ, ກົມຊົນເຜົ່າ ພ້ອມດ້ວຍພະນັກງານທີ່ກ່ຽວ ຂ້ອງເຂົ້າຮ່ວມ ທີ່ຫ້ອງຮັບແຂກ ສນຊ, ໃນວັນທີ 25 ມັງກອນ 2018.

ໂອກາດນີ້, ທ່ານຮອງປະທານ ສນຊ ໄດ້ສະແດງຄວາມຕ້ອນຮັບ ແລະ ຊົມເຊີຍການມາ

ເຄື່ອນໄຫວຢ້ຽມຢາມ ແລະ ເຮັດວຽກຢ່າງເປັນທາງການຢູ່ ສປປ ລາວ ຂອງຄະນະຜູ້ແທນດັ່ງ ກ່າວ ເຊິ່ງເປັນການປະກອບສ່ວນເຂົ້າໃນການເພີ່ມທະວີສາຍພົວພັນລະຫວ່າງ ສອງພັກ-ສອງ ລັດ ກໍ່ຄືປະຊາຊົນສອງປະເທດ ໃຫ້ມີຄວາມແໜ້ນແຟ້ນຍິ່ງໆຂຶ້ນ. ໃນນີ້, ທ່ານ ເຈິງ ຈຽນ ຊີ ໄດ້ສະແດງຄວາມຂອບໃຈເປັນຢ່າງຍິ່ງຕໍ່ການຕ້ອນຮັບອັນອົບອຸ່ນໃນຄັ້ງນີ້ ພ້ອມທັງລາຍງານຈຸດ ປະສົງໃນການມາຢ້ຽມຢາມ ແລະ ຜົນການພົບປະແລກປ່ຽນບົດຮຽນຂອງທັງສອງຝ່າຍ ລະ ຫວ່າງ ກົມສາສະໜາ ສູນກາງແນວລາວສ້າງຊາດ ແລະ ຄະນະກໍາມະການຊົນເຜົ່າ ແລະ ສາສະໜາ ແຂວງຢຸນນານ ໃຫ້ທ່ານຮອງປະທານຮັບຊາບ.

     ໃນວັນດຽວກັນນັ້ນ, ໄດ້ມີການພົບປະແລກປ່ຽນບົດຮຽນສອງຝ່າຍ ລະຫວ່າງ ກົມສາສະໜາ ສູນກາງແນວລາວສ້າງຊາດ ແລະ ຄະນະກໍາມະການ ຊົນເຜົ່າ ແລະ ສາສະໜາ ແຂວງ ຢຸນນານ ສປ ຈີນ ເຊິ່ງຝ່າຍລາວນຳໂດຍ ທ່ານ ບຸນທະວີ ພອນທະສິນ ຮອງຫົວໜ້າກົມສາສະໜາ ສູນກາງແນວລາວສ້າງຊາດ ຝ່າຍຈີນນຳໂດຍ ທ່ານ ເຈິງ ຈຽນ ຊີ, ຮອງຫົວໜ້າຄະນະກຳມະການສາສະໜາ ແຂວງຢຸນນານ;

      ການແລກປ່ຽນບົດຮຽນຄັ້ງນີ້  ທ່ານ ບຸນທະວີ ພອນທະສິນ ໄດ້ສະແດງຄວາມຍິນດີຕ້ອນຮັບ ແລະ ຕີລາຄາສູງຕໍ່ການມາເຮັດວຽກຄະນະຜູ້ແທນດັ່ງກ່າວ. ພ້ອມນັ້ນ, ໄດ້ແຈ້ງສະ ພາບລວມຂອງວຽກງານສາສະໜາ ຢູ່ ສປປ ລາວ ແລະ ໄດ້ຍົກໃຫ້ເຫັນປະຫວັດ, ມູນເຊື້ອ, ພາລະບົດບາດ, ໜ້າທີ່ຂອງແນວລາວສ້າງຊາດ ແລະ ກົມສາສະໜາໃຫ້ໄດ້ຮັບຮູ້. ຈາກນັ້ນ, ທັງສອງຝ່າຍໄດ້ປຶກສາຫາລືແລກປ່ຽນຄຳຄິດຄຳເຫັນກັນໃນຫລາຍໆບັນຫາເປັນຕົ້ນ: ການເພີ່ມທະວີການຮ່ວມມືການແລກປ່ຽນຄະນະຜູ້ແທນຂັ້ນສູງ ແລະ ຂັ້ນວິຊາການຂັ້ນຕ່າງໆທີ່ເຮັດວຽກງານການຄຸ້ມຄອງສາສະໜາ, ສືບຕໍ່ຮ່ວມມືໃນການພົວພັນການຜັນຂະຫຍາຍເຖິງວຽກງານສາສະໜາດ້ວຍຫລາຍຮູບການ, ເພີ່ມທະວີຄວາມສາມາດວຽກງານການຈັດຕັ້ງສູນກາງແນວລາວສ້າງຊາດ ແລະ ຄະນະກຳມະການຊົນເຜົ່າ, ສາສະໜາ ແຂວງຢຸນນານ, ​ເພີ່ມ​ທະວີ​ການ​ຮ່ວມ​ມື, ການ​ຊ່ວຍ​ເຫລືອ​ເຊິ່ງກັນ ​ແລະ ກັນ ​ໃນ​ການ​ພັດທະນາ​ເສດຖະກິດ-​ສັງຄົມ, ການຍົກລະດັບຄວາມຮູ້, ແລກປ່ຽນບົດຮຽນດ້ານວິຊາການ ເພື່ອການພັດທະນາຊັບພະຍາກອນມະນຸດ  ໃຫ້ແກ່ພະນັກງານຜູ້ເຮັດວຽກງານສາສະໜາ, ​ການ​ກໍ່​ສ້າງ​ພື້ນຖານ​ໂຄ່ງ​ລ່າງ, ດ້ານວັດຖຸ, ອຸປະກອນ, ເຄື່ອງຮັບໃຊ້ຕ່າງໆທີ່ສໍາຄັນ ແລະ ຈໍາເປັນ ສືບຕໍ່ແລກປ່ຽນຄະນະຜູ້ແທນລະດັບສູງ, ຈັດຝຶກອົບຮົມວຽກງານການຄຸ້ມຄອງສາສະໜາ ໃຫ້ພະນັກງານທີ່ເຮັດວຽກດັ່ງກ່າວບໍ່ວ່າຢູ່ສູນກາງ ແລະ ລະດັບທ້ອງຖິ່ນ, ຊຸກຍູ້ການແລກປ່ຽນ ແລະ ຮ່ວມມືອົງການຈັດຕັ້ງທ້ອງຖິ່ນ ໂດຍສະ ເພາະບັນດາແຂວງທີ່ມີຊາຍແດນຕິດຈອດກັນ ເຊິ່ງການພົບປະແລກປ່ຽນບົດຮຽນນໍາກັນໃນຄັ້ງນີ້ ທັງສອງຝ່າຍຈະຮ່ວມມືກັນຜັນຂະຫຍາຍໄປເທື່ອລະກ້າວ ເພື່ອເຮັດໃຫ້ວຽກງານດັ່ງກ່າວຂອງທັງສອງຝ່າຍ ສາມາດເກີດດອກອອກຜົນເປັນຮູບປະທໍາ ແລະ ເກີດປະໂຫຍດສູງສຸດ.

2018-01-26

ປະຕິທິນ

Feb-2018
S M T W T F S
1 2 3
4 5 6 7 8 9 10
11 12 13 14 15 16 17
18 19 20 21 22 23 24
25 26 27 28

ລິຂະສິດ © 2015
ອົງການແນວລາວສ້າງຊາດສະຫງວນລິຂະສິດໄວ້ທັງໜົດ