ແນະນຳ ສນຊ (LFND)

ກອງປະຊຸມປຶກສາຫາລື ວຽກງານໂພສະນາການ...

        ສູນກາງແນວລາວສ້າງຊາດ ໄດ້ຈັດກອງປະຊຸມປຶກສາຫາລືການໂຄສະນາວຽກງານໂພສະນາການ, ສັກຢາກັນພະຍາດ, ສຸຂະພາບອະນາໄມ, ການຕ້ານການໃຊ້ຄວາມຮຸນແຮງຕໍ່ເດັກ, ການຄ້າມະນຸດ ແລະ ການສຶກສາສໍາລັບເດັກກ່ອນໄວຮຽນ ຂຶ້ນໃນ ລະຫວ່າງ ວັນທີ 11-13 ກັນຍາ 2017 ນີ້, ທີ່ສູນຝຶກອົບຮົມສູນກາງແນວລາວສ້າງຊາດ

ໂດຍການເປັນປະທານຂອງທ່ານ ຮສ. ດຣ. ສົມອົກ ກິ່ງສະດາ ຮອງປະທານສູນກາງແນວລາວສ້າງຊາດ, ເປັນກຽດເຂົ້າຮ່ວມ ມີທ່ານ ລີໂອ ຟາເບີ, ເອກອັກຄະລັດຖະທູດ ສະຫະພາບເອີຮົບ ປະຈໍາລາວ, ທ່ານ ມີໂອ ຊິນຢູນ, ຮັກສາການຜູ້ຕາງໜ້າອົງ ການຢູນີເຊັບປະຈໍາ ສປປ ລາວ, ມີບັນດາທ່ານຮອງປະທານ, ຫົວໜ້າຫ້ອງການ ແລະ ພະນັກງານແນວລາວສ້າງຊາດ ຈາກ 17 ແຂວງ-ນະຄອນຫຼວງວຽງຈັນ ພ້ອມດ້ວຍພະນັກງານທີ່ກ່ຽວຂ້ອງເຂົ້າຮ່ວມ ຈໍານວນ 100 ກວ່າທ່ານ.

        ກອງປະຊຸມຄັ້ງນີ້ ເປັນການຈັດຕັ້ງຜັນຂະຫຍາຍບົດບັນທຶກຮ່ວມມື ລະຫວ່າງ ສູນການແນວລາວສ້າງຊາດ ກັບ ອົງ ການ ຢູນີເຊັບ ໃນຕົ້ນເດືອນພຶດສະພາ ປີ 2017 ນີ້ ເຊິ່ງເນື້ອໃນທີ່ນໍາມາປຶກສາຫາລືໃນກອງປະຊຸມຄັ້ງນີ້ປະກອບມີ: ວຽກງານ ໂພຊະນາການ, ການສັກຢາກັນພະຍາດ, ການຮັກສາສຸຂະພາບອະນາໄມ, ການປົກປ້ອງເດັກ ແລະ ການສຶກສາສໍາລັບເດັກ ກ່ອນໄວຮຽນ ເພື່ອເປັນການສ້າງຄວາມຮັບຮູ້ໃຫ້ຜູ້ເຂົ້າຮ່ວມມີຄວາມເຂົ້າໃຈໃນການນໍາໄປເຜີຍແຜ່ໂຄສະນາ ແລະ ປຸກລະດົມ ປະຊາຊົນລາວບັນດາເຜົ່າ ໃຫ້ຮູ້ຮັກສາສຸຂະພາບຢ່າງຖືກຫຼັກອະນາໄມ ຫຼີກລ້ຽງການໃຊ້ຄວາມຮຸນແຮງທາງດ້ານຮ່າງກາຍ ແລະ ຈິດໃຈຕໍ່ແມ່ຍິງ ແລະ ເດັກນ້ອຍ; ທັງເປັນການເສີມຂະຫຍາຍ ບົດບາດຂອງແນວລາວສ້າງຊາດ ແຕ່ລະຂັ້ນໃນການປະກອບ ສ່ວນວຽກງານດັ່ງກ່າວຕາມພາລະບົດບາດຂອງຕົນ.

        ໃນໄລຍະຜ່ານມາ: ການຮ່ວມມືຢ່າງເປັນທາງການ ລະຫວ່າງ ສູນກາງແນວລາວສ້າງຊາດ ແລະ ອົງການຢູນີເຊັບ ແມ່ນ ເລີ່ມຕົ້ນໃນປີ 2015 ໂດຍເລັ່ງໃສ່ການປັບປຸງຊີວິດການເປັນຢູ່ທີ່ດີຂອງແມ່ຍິງ ແລະ ເດັກ ໃນຂອບເຂດທົ່ວປະເທດ ໂດຍສະ ເພາະແມ່ນໃນເຂດຫ່າງໄກສອກຫຼີກ ຕະຫຼອດໄລຍະ 2 ປີຜ່ານມາ. ອົງການຢູນີເຊັບ ແລະ ສູນກາງແນວລາວສ້າງຊາດ ໄດ້ຮ່ວມ ກັນເຮັດວຽກໃນການເຂົ້າເຖິງປະຊາຊົນລາວບັນດາເຜົ່າ ທີ່ຢູ່ເຂດທຸລະກັນດານ ແລະ ດ້ອຍໂອກາດໃນເຂດຊົນເຜົ່າຕ່າງໆຕາມ ພາລະບົດບາດ, 2 ອົງການ ລະຫວ່າງ ສນຊ ກັບ ຢູນີເຊັບ ໄດ້ຮ່ວມກັນ ຕອບໂຕ້ການລະບາດຂອງພະຍາດໂປລີໂອ ແລະ ຈະ ສືບຕໍ່ປະກອບສ່ວນເຂົ້າໃນການໂຄສະນາຊຸກຍູ້ການປັບປຸງວຽກງານຮັກສາສຸຂະພາບ ແລະ ຊີວິດການເປັນຢູ່ທີ່ດີຂອງແມ່ ແລະ ເດັກ. ກອງປະຊຸມຄັ້ງນີ້ ໂດຍໄດ້ຮັບການອຸປະຖໍາທຶນ ຈາກອົງການຢູນີເຊັບປະຈໍາລາວ ແລະ ຍັງໄດ້ມອບເຄື່ອງຂະຫຍາຍສຽງ ໃຫ້ແນວລາວສ້າງຊາດ ບັນດາແຂວງ-ນະຄອນຫຼວງວຽງຈັນ ພາກສ່ວນລະ 01 ເຄື່ອງ ເພື່ອນຳໄປໃຊ້ໃນການໂຄສະນາຢູ່ທ້ອງ ຖິ່ນຂອງຕົນ.

2017-09-13

ປະຕິທິນ

Jun-2018
S M T W T F S
1 2
3 4 5 6 7 8 9
10 11 12 13 14 15 16
17 18 19 20 21 22 23
24 25 26 27 28 29 30

ລິຂະສິດ © 2015
ອົງການແນວລາວສ້າງຊາດສະຫງວນລິຂະສິດໄວ້ທັງໜົດ