ແນະນຳ ສນຊ (LFNC)

ຄະນະຜູ້ແທນສູນກາງແນວລາວສ້າງຊາດ ສຳເລັດການຢ້ຽມຢາມ ແລະ ເຮັດວຽກ ທີ່ຣາຊະອານາຈັກໄທ

     ຄະນະຜູ້ແທນ ສູນກາງແນວລາວສ້າງຊາດ ໄດ້ສຳເລັດການຢ້ຽມຢາມ ແລະ ເຮັດວຽກ ທີ່ຣາຊະອານາຈັກໄທ ນຳໂດຍທ່ານ ນາງ ຍອດແກ້ວມະນີ ສຸພານຸວົງ ຮອງປະທານສູນກາງແນວລາວສ້າງຊາດ.

     ໃນວາລະການຢ້ຽມຢາມ ແລະ ເຮັດວຽກ ໂດຍໄດ້ຮັບການຕ້ອນຮັບຢ່າງອົບອຸ່ນຈາກຝ່າຍໄທ ເຊິ່ງໄດ້ເຂົ້າຮ່ວມງານພິທີຫຼໍ່ຄຳ ທີ່ຈະນຳໄປຫຸ້ມຍອດຊໍ່ຟ້າຝັງເພັດພະທາດທ່າອຸເທນ ທີ່ແຂວງນະຄອນພະນົມ ຣາຊະອານາຈັກໄທ ໂດຍເປັນກຽດເຂົ້າຮ່ວມມີ ທ່ານ ນາງ ຍອດແກ້ວມະນີ ສຸພານຸວົງ ຮອງປະທານສູນກາງແນວລາວສ້າງຊາດ ພ້ອມດ້ວຍຄະນະ, ທ່ານ ພົມເອກ ໄພບູນ ຄຸ້ມ ສາຍາ ອົງຄະມົນຕີແຫ່ງຣາຊະອານາຈັກໄທ, ທ່ານ ປະທີບ ຣິດທິກຸນ ຮອງເຈົ້າແຂງນະຄອນພະນົມ, ມີຄະນະກຳມະການກິດຕິ ມະສັກມູນນິທິທຳດີ ພ້ອມດ້ວຍແຂກກິດຕິມະສັກເຂົ້າຮ່ວມຢ່າງຫຼວງຫຼາຍ ທີ່ວັດພະທາດທ່າອຸເທນ.

     ໃນນີ້, ໄດ້ມີພິທີທາງສາສະໜາ, ຈູບທູບທຽນໄວ້ພະລັດຕະນະໄຕ ຫຼັງຈາກນັ້ນ, ທ່ານ ສະໜານ ຄຸບາກອບໄພບູນສິຣິ ປະ ທານອຳນວຍການໂຄງການທຳທອງຄຳ ໄດ້ກ່າວສະແດງຄວາມຍີນດີຕ້ອນຮັບທ່ານຮອງປະທານສູນກາງແນວລາວສ້າງຊາດ ພ້ອມດ້ວຍຄະນະ ແລະ ກ່າວຈຸດປະສົງໃນພິທີຫຼໍ່ຄຳທີ່ຈະນຳໄປຫຸ້ມຍອດຊໍ່ຟ້າພະທາດທ່າອຸເທນ ຊຶ່ງເປັນຈຸດສູງສຸດ ຂອງພະທາດ ທ່າອຸເທນ ເພື່ອອຸທິສວນກຸສົນແກ່ດວງວີນຍານຂອງ ທ່ານປະທານ ສຸພານຸວົງ ເນື່ອງໃນໂອກາດວັນຄ້າຍ ວັນເກີດ ຄົບຮອບ 108 ປີ (13/7/1909-13/7/2017) ແລະ ອຸທິດບຸນກຸສົນເຖີງດວງ ພຣະວີນຍານ ພຣະບາດສົມເດັດພຣະປໍຣະມິນທະຣະມະ ຫາພູມິພົນອະດຸນຍະເດດ ໃນຫຼວງຣາດສະການທີ 9 ແຫ່ງຣາຊະອານາຈັກໄທ. ພ້ອມກັນນີ້, ທ່ານຮອງປະທານສູນກາງແນວ ລາວສ້າງຊາດ ໄດ້ກ່າວຄຳປາໃສຕໍ່ພິທີດັ່ງກ່າວ ເຊິ່ງກ່ອນອື່ນທ່ານໄດ້ກ່າວ ສະແດງຄວາມຂອບໃຈຢ່າງສູງຕໍ່ການຕ້ອນຮັບຄະນະ ຜູ້ແທນແນວລາວສ້າງຊາດ ຢ່າງອົບອຸ່ນ ແລະ ສົມກຽດ ໂດຍສະເພາະການນໍາຂອງແຂວງນະຄອນພະນົມ ໃນການເຂົ້າສູ່ພິທີສູດ ສິລິມົງຄຸນຫຼໍ່ຄຳຫຸ້ມຍອດຊໍ່ຟ້າຝັງເພັດພຣະທາດທ່າອຸເທນ ແລະ ຂອບໃຈເປັນຢ່າງຍິ່ງ ທີ່ໄດ້ຈັດງານບຸນກຸສົນອັນສະຫງ່າລາສີ ເຖິງດວງວີນຍານຂອງ ທ່ານປະທານ ສຸພານຸວົງ ເຊິ່ງເປັນປະທານປະເທດຜູ້ທຳອິດ ຂອງ ສປປ ລາວ. ເປັນຕົ້ນແມ່ນມູນນິທິ ທຳດີ ເຊິ່ງໄດ້ສະແດງເຖິງການຮັກສາມູນເຊື້ອຄວາມສາມັກຄີທີ່ໄດ້ສ້າງມາແຕ່ບູນຮານ, ທັງເປັນການເພີ່ມພູນຄູນສ້າງສາຍພົວ ພັນມິດຕະພາບຂອງປະຊາຊົນສອງຊາດ ລາວ-ໄທ ໃຫ້ຄວາມສາມັກຄີປອງດອງກັນຍິ່ງໆຂຶ້ນ.

     ພາຍຫຼັງທີ່ສຳເລັດພິທີຫຼໍ່ຄຳຫຸ້ມຍອດຊໍ່ຟ້າແລ້ວ ຄະນະໄດ້ໄປຢ້ຽມຢາມສະຖານທີ່ປະຫວັດສາດຄື: ອະນຸສອນສະຖານປະ ທານໂຮ່ຈີມີນ, ຢ້ຽມຢາມພື້ນຖານວັດທະນາທຳທີ່ວັດຄາມະວາສີ, ເຂົ້ານະມັດສະການເຈົ້າອະທິການວັດພະທາດພະນົມ ແລະ ທ່ຽວຊົມວັດພະທາດພະນົມ ເພື່ອສັກກາລະບູຊາຕາມຮີດຄອງປະເພນີ ຕື່ມອີກ.

     ການເຄື່ອນໄຫວຢ້ຽມຢາມ ແລະ ເຮັດວຽກ ຂອງຄະນະຜູ້ແທນ ສູນກາງແນວລາວສ້າງຊາດ ທີ່ຣາຊະອານາຈັກໄທ ໃນຄັ້ງນີ້, ລະຫວ່າງວັນທີ 4-6 ຕຸລາ 2017 ໄດ້ຮັບຜົນສຳເລັດຢ່າງຈົບງາມ.

2017-10-12

ປະຕິທິນ

Oct-2017
S M T W T F S
1 2 3 4 5 6 7
8 9 10 11 12 13 14
15 16 17 18 19 20 21
22 23 24 25 26 27 28
29 30 31

ລິຂະສິດ © 2015
ອົງການແນວລາວສ້າງຊາດສະຫງວນລິຂະສິດໄວ້ທັງໜົດ